Track Order Status

ਪੰਜਾਬੀ ਨਾਟਕ ਦੇ ਬਾਰੇ ਹੁਣ ਤੱਕ ਇਹ ਮੰਨਿਆ ਜਾਂਦਾ ਸੀ ਕਿ ਇਸ ਦੀ ਕੋਈ ਕੇਂਦਰੀ ਪਛਾਣ ਨਾ ਹੋਣ ਕਾਰਣ ਇਸ ਦਾ ਨਾਟ-ਸ਼ਾਸਤਰ ਰਚਿਆ ਜਾਣਾ ਸੰਭਵ ਨਹੀਂ। ਪਰ ਪਾਲੀ ਭੁਪਿੰਦਰ ਸਿੰਘ ਰਚਿਤ 'ਪੰਜਾਬੀ ਨਾਟ-ਸ਼ਾਸਤਰ' ਇਸ ਮਿਥ ਨੂੰ ਤੋੜਦਾ ਹੈ। ਵੀਹਵੀਂ ਅਤੇ ਇੱਕੀਵੀਂ ਸਦੀ ਦੇ ਕੋਈ 1200 ਤੋਂ ਵਧੀਕ ਪੰਜਾਬੀ ਨਾਟਕਾਂ ਦਾ ਵਿਸਤ੍ਰਿਤ ਵਿਸ਼ਲੇਸ਼ਣ ਕਰ ਕੇ ਪਾਲੀ ਭੁਪਿੰਦਰ ਸਿੰਘ ਨੇ ਨਾ ਸਿਰਫ਼ ਪੰਜਾਬੀ ਨਾਟਕ ਦੇ ਪਛਾਣ-ਚਿੰਨ੍ਹ ਨਿਰਧਾਰਿਤ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ ਸਗੋਂ ਇਸ ਦੀਆਂ ਵਿਸ਼ੇ ਅਤੇ ਵਿਧੀਗਤ ਵਿਲੱਖਣਤਾਵਾਂ ਦੇ ਅਧਾਰ ‘ਤੇ ਇਹ ਪੰਜਾਬੀ ਨਾਟ ਸ਼ਾਸਤਰ ਤਿਆਰ ਕੀਤਾ ਹੈ। ਪੰਜਾਬੀ ਨਾਟਕ ਦਾ ਸ਼ਾਇਦ ਹੀ ਕੋਈ ਵਿਸ਼ੇਗਤ ਜਾਂ ਵਿਧੀਗਤ ਪੈਟਰਨ ਹੋਵੇ ਜੋ ਪਾਲੀ ਦੀ ਬਰੀਕ ਨਜ਼ਰ ਤੋਂ ਬਚ ਸਕਿਆ ਹੋਵੇ। 

“ਪੰਜਾਬੀ ਨਾਟਕ ਆਮ ਆਦਮੀ ਦੇ ਕੇਂਦਰੀ ਪਾਤਰ ਤੋਂ ਨਾਇਕ ਬਣਨ ਦਾ ਨਾਟਕ ਹੈ ਅਤੇ ਦੁਖਾਂਤ-ਸੁਖਾਂਤ ਦੇ ਵਿਪਰੀਤ ਇਹ ਇੱਕ ਤੀਜੀ ’ਆਸਵੰਤ' ਸੁਰ ਦਾ ਨਾਟਕ ਹੈ,”  ਪੰਜਾਬੀ ਨਾਟਕ ਨੂੰ ਪਰਿਭਾਸ਼ਿਤ ਕਰਦਿਆਂ ਪਾਲੀ ਭੁਪਿੰਦਰ ਸਿੰਘ ਇਹ ਸਿਧਾਂਤ ਕਾਇਮ ਕਰਦੇ ਹਨ। 

ਪਾਲੀ ਭੁਪਿੰਦਰ ਸਿੰਘ ਨੇ ਆਪਣੇ ਇਸ ਖੋਜ-ਪ੍ਰਬੰਧ ਵਿੱਚ ਵਿਸ਼ਵ-ਸੱਭਿਅਤਾ ਵਿੱਚ ਨਾਟ-ਕਲਾ ਦੇ ਇਤਿਹਾਸ ਨੂੰ ਮੁੜ-ਖੰਘਾਲਿਆ ਹੈ ਤੇ ਅਨੇਕ ਚਿਰ-ਸਥਾਪਿਤ ਮਿਥਾਂ ਨੂੰ ਚੁਣੌਤੀ ਦਿੱਤੀ ਹੈ। ਅਨੇਕ ਪੰਜਾਬੀ ਦੇ ਅਣਗੌਲੇ ਨਾਟਕਕਾਰਾਂ ਅਤੇ ਉਨ੍ਹਾਂ ਦੀਆਂ ਮੁੱਲਵਾਨ ਰਚਨਾਵਾਂ ਨੂੰ ਅੱਗੇ ਲੈ ਕੇ ਆਉਂਦਾ ਹੈ। ਪੰਜਾਬੀ ਨਾਟਕ ਅਤੇ ਇਕਾਂਗੀ ਦੇ ਵੱਖਰੇ ਗੁਣ-ਲੱਛਣ ਨਿਰਧਾਰਿਤ ਕੀਤੇ ਹਨ। ਪੰਜਾਬੀ ਰੰਗਮੰਚ ਦੇ ਪੰਜਾਬੀ ਨਾਟਕ ਨਾਲ ਸਬੰਧਾਂ ਨੂੰ ਸਥਾਪਿਤ ਕੀਤਾ ਹੈ। 

‘ਪੰਜਾਬੀ ਨਾਟ-ਸ਼ਾਸਤਰ’ ਨਾਟਕ ਅਤੇ ਰੰਗਮੰਚ ਬਾਰੇ ਖੋਜ ਅਤੇ ਅਧਿਐਨ ਕਰਨ ਲਈ ਇਹ ਇੱਕ ਮਹੱਤਵਪੂਰਨ ਦਸਤਾਵੇਜ ਹੈ।