Track Order Status

'ਇਸ਼ਕ ਝਨਾ' ਹਰਜੀਤ ਇੰਦਰ ਦੀ ਪਲੇਠੀ ਕਾਵਿ ਸਿਰਜਣਾ ਹੈ। ਜੋ ਘਰੇਲੂ ਜੀਵਨ, ਇਸ਼ਕ, ਰਿਸ਼ਤਾ-ਨਾਤਾ ਪ੍ਰਬੰਧ ਅਤੇ ਇਕ ਸਧਾਰਨ ਪਰਿਵਾਰ ਨਾਲ ਸਬੰਧ ਰੱਖਣ ਵਾਲੇ ਨੌਜਵਾਨ ਨੂੰ ਦਰਪੇਸ਼ ਮਾਨਸਿਕ ਗੁੰਝਲਾਂ ਜਿਹੇ ਸੂਖਮ ਵਿਸ਼ਿਆਂ ਦੀ ਪੜਚੋਲ ਕਰਦੀ ਹੈ। ਉਸ ਦੀ ਕਵਿਤਾ ਵਿੱਚ ਨਾਰੀਵਾਦੀ ਦ੍ਰਿਸ਼ਟੀਕੋਣ ਵਿਸ਼ੇਸ਼ ਤੌਰ 'ਤੇ ਉਭਰ ਕੇ ਸਾਹਮਣੇ ਆਉਂਦਾ ਹੈ, ਜੋ ਔਰਤਾਂ ਦੇ ਤਜ਼ਰਬਿਆਂ ਨੂੰ ਇੱਕ ਤਾਜ਼ਾ ਅਤੇ ਸੰਵੇਦਨਸ਼ੀਲ ਢੰਗ ਨਾਲ ਪੇਸ਼ ਕਰਦਾ ਹੈ। ਔਰਤ ਨੂੰ ਕਣਕ ਦੇ ਮੈਟਾਫਰ ਰਾਂਹੀ ਵਿਅਕਤ ਕਰਨ ਦੀ ਉਸਦੀ ਸਹਿਝ ਸੂਝ ਨਿਵੇਕਲੀ ਸ਼ੈਲੀ ਅਤੇ ਚਿੰਤਨੀ ਦ੍ਰਿਸ਼ਟੀ ਦੀ ਲਖਾਇਕ ਹੈ। ਜਿਵੇਂ ਅੰਨ ਪੂਰੇ ਆਦਮ ਜਗਤ ਦਾ ਪੇਟ ਪਾਲਦਾ ਹੈ, ਉਸੇ ਤਰਜ਼ੇ ਔਰਤ ਪੂਰੇ ਪਰਿਵਾਰ ਨੂੰ ਇੱਕ ਕੜੀ ਵਾਂਗ ਜੋੜ ਕੇ ਪੂਰੇ ਪਰਿਵਾਰ ਨੂੰ ਪਾਲਦੀ ਹੈ, ਤੇ ਇਟਾਂ ਦੇ ਮਕਾਨ ਨੂੰ ਘਰ ਵਿੱਚ ਤਬਦੀਲੀ ਕਰਦੀ ਹੈ। ਥੀਮਿਕ ਪੈਟਰਨ ਪੱਖੋਂ ਇਹ ਕਾਵਿ ਨਾਰੀਵਾਦੀ, ਰੋਮਾਂਟਿਕ, ਘਰੋਗੀ ਜੀਵਨ ਅਤੇ ਨਿੱਜੀ ਵਿਸ਼ਿਆਂ ਨੂੰ ਆਪਣੇ ਕਲੇਵਰ ਵਿਚ ਲੈਂਦਾ ਹੈ।

ਭਾਵੇਂ ਕਿਤੇ-ਕਿਤੇ ਭਾਵਾਂ ਦੀ ਤੀਬਰਤਾ ਵਿਚਾਰਾਂ ਨੂੰ ਧੁੰਦਲਾ ਅਤੇ ਅਸਪਸ਼ਟ ਕਰਦੀ ਪ੍ਰਤੀਤ ਹੁੰਦੀ ਹੈ ਪਰ ਫਿਰ ਵੀ ਪਲੇਠੀ ਕਾਵਿ ਪੁਸਤਕ ਹੋਣ ਕਾਰਨ ਇਹ ਕਾਵਿ ਸਲਾਹੁਣਯੋਗ ਤੇ ਮਾਨਣ ਯੋਗ ਹੈ । ਹਰਜੀਤ ਦੀ ਭਾਸ਼ਾ ਨਿਵੇਕਲੀ ਅਤੇ ਚਿੱਤਰਮਈ ਹੈ, ਜਿਸ ਵਿੱਚ ਬਿੰਬ, ਪ੍ਰਤੀਕ, ਅਲੰਕਾਰ ਅਤੇ ਪੇਂਡੂ ਸ਼ਬਦਾਵਲੀ ਦੀ ਭਰਪੂਰ ਵਰਤੋਂ ਕੀਤੀ ਗਈ ਹੈ। ਫਿਰੋਜ਼ਪੁਰ ਜਿਲ੍ਹੇ ਦਾ ਵਸਨੀਕ ਹੋਣ ਕਰਕੇ, ਉਸਦੀ ਕਵਿਤਾ ਵਿੱਚ ਪੰਜਾਬ ਦੇ ਸਰਹੱਦੀ ਖੇਤਰ ਦੀ ਵਿਲੱਖਣ ਟੋਨ ਅਤੇ ਸ਼ੈਲੀ ਵੀ ਝਲਕਦੀ ਹੈ। ਇਸ ਕਾਵਿ-ਪੁਸਤਕ ਦੀਆਂ ਖੂਬੀਆਂ ਅਤੇ ਕਮੀਆਂ ਸਮੇਤ, ਪਾਠਕ ਇਸ ਨੂੰ ਭਰਵਾਂ ਹੁੰਗਾਰਾ ਦੇਣ ਅਤੇ ਖੁਸ਼ਆਮਦੀਦ ਕਹਿਣ। 

-ਵਕੀਲ ਸਿੰਘ